Ek woon hier in 'n 5e vloer dubbelwoonstel met 'n nadoktorale genoot in Fisika van Ukraine (meer oor hom in 'n ander post). Die woonstel is heel gerieflik (sien foto's) en baie modern. Natuurlik het al die kamers central heating en double-glazed vensters, wat ek elke dag meer en meer waardeer. Die deure is ook dik en die kosyne seël dig, wat verder help om dit warm te hou. Dit maak die kamers ook taamlik klankdig, waaroor ek baie bly is.
Die badkamer is voldoende (stort, toilet en wasbak) en het die grootste en warmste verhitter. Dis dus die aangewese plek om 'n nat broek of nat skoene te plaas om vinnig droog te word.
Al wat ek het teen die plek, is die swak verskoning vir 'n kombuis. Hier's 'n wasbak, 2 plaat stoof en 'n yskas. Ek het nou nie 'n koffiemasjien verwag nie, en 'n oond sou ook 'n (welkome) luuksheid gewees het, maar mens verdag darem 'n mikrogolf en 'n ketel, of hoe? Ons kook nou maar water op die stoof as ons iets wil maak, maar ek gaan regtig kyk vir 'n ketel op 'n stadium.
Ek't ook 'n gebruik vir my vlag gevind. Al die internasionale studente hier hang hul landsvlae van hul balkonne af, om te wys waarvandaan almal kom. Ek't nou dieselfde gedoen, met die cable ties wat ek (per ongeluk) by die 1 Euro winkel gekry het.
